هذاك اليوم اجت وحده منهن زعلانة لبيت أخوها وعدها وليد زغير ظل يبجي يريد ربع من امه وهيه ماعدها وأخوها بالشغل يشتغل بالسوك وبعده ماجاي وتستحي تطلب من مرت أخوها لان الزعلانة تشوف نفسها ذليلة ومهضومة من تطلب
واحتارت شسوي ولن طبت أخوها للبيت وجيوبه متروسه من الفلوس الحديد الخردة ويخرخشن بجيبه
سلمت على اخوها وسولفتله سبب زعلتها والولد يبچي يريد ربع من أمه
أم ألولد گالت لخوها خويه ماعدك ربع لوليدي اريده يسكت من البچي
گاللها لا ماعندي هم زعلانة وهم تطلبين فلوس انهضمت من كلام أخوها وظل هذا الكلام يأكل بگلبها أسنين طويلة وماتنساه وكلما تشوفه تذكر سالفة الربع
لان يگولون( ياهضم الرجال ولاهضم الولي )
وبعد هاي السنين مات اخوها وأجت للفاتحه هيه وابنها
والولد صار رجال واكف بفاتحة خاله طلبو من عنده يجيب حاجة من داخل البيت البيه النسوان دخل الولد للنسوان شاف خالاته يبچن ويلطمن
الخوة وي اهل المروة گضيناها
وأمه گاعدة ولاكأنما ميت أخوها!
سأل امه گاللها يمه شو خالاتي يلطمن ويبچن وانتي چنچ غريبة وماتبچين
گالتله يمه
گلبي مثل جلد الضبع
أطابعه وما ينطبع
أبچي ويعرضلي الربع
گاللها يمه ياربع گالتله يمه انت چنت زغير
وسولفتله سالفة خاله
مر عوزي وتعنيت لبن امي اشكيه..
لاحن علي لا گال خل انا انطيه.
.....................
شاهد سالفتنه
بعض الكلام يكون مؤثر عند الاخت
لان الاخ هو سند اخته ويكون كلامه الطيب بلسماً لجراحها عندما تحتاجه
تحياتي لكل اخو مداري أخته
وتحياتي لكل اخت تحافظ على اهلها و تنطي حك الخوة
